Ndrysho madhësinë e shkronjave

verzioni për printim

copyright

BIRN-i në Kosovë diskuton për zgjedhjet komunale në Bujanoc

09 maj 2008  BIRN-i në Kosovë ka organizuar një debat me përfaqësuesit e partive politike të cilat garojnë në zgjedhjet komunale në Bujanoc, në të cilin është folur për programet zgjedhore të tyre dhe çfarë mund të ofrojnë ata për të përmirësuar jetën e qytetarëve.

Të ftuar për diskutuar rreth këtyre çështjeve kanë qenë:

Shaip Kamberi – Partia për Veprim Demokratik, PVD
Miodrag Milkovic – Grupi i qytetarëve (Grupa Gradjana)
Nenad Mitrovic – Koalicioni për një të Nesërme më të Mirë (Koalicija za bolje sutra)
Jonuz Musliu – Lëvizja e Progresit Demokratik, LPD
Sali Salihu – Koalicioni PDSH-PDK (Partia Demokratike Shqiptare dhe Partia Demokratike Kombëtare)
Dalibor Stanojkovic – Partia Demokratike e Serbisë, DSS
Goran Taskovic- Partia Demokratike, bartës i listës zgjedhore për Bujanoc – për një Serbi Evropiane – Boris Tadic
Mejdi Zeqiri – Unioni Demokratik Shqiptar, UDSH

Kamberi ka filluar debatin duke elaboruar rreth programit të PVD-së i cili bazohet në zhvillimin infrastrukturor, tërheqjen e investimeve, zhvillimin ekonomik dhe ngritjen e kapaciteteve njerëzore si dhe përforcimin e pushtetit lokal përmes decentralizimit.

Milkovic, në anën tjetër, ka thënë se grupi i tij nuk është si partitë tjera që promovojnë figurat qendrore, por fokusohet në zhvillimin lokal dhe në ngritjen e standardeve jetësore.

“Synimi jonë është që ta drejtojmë vëmendjen e qeverisë qendrore drejt Bujanocit,” ka shpjeguar Mitrovic duke thënë pse entiteti i tij do të punojë për të gjithë qytetarët pa marrë parasysh etnicitetin e tyre.

“Komuna e Bujanocit ka jashtëzakonisht potencial për zhvillim industrial dhe ne do ta shfrytëzojmë këtë mundësi,” ka shtuar Mitrovic.

Musliu ka thënë se programi i partisë së tij dallon nga të tjerat dhe se ata janë të gatshëm të ulen dhe të punojnë me të gjitha grupet etnike në interes të të gjithëve.

“Popullata jonë ka më tepër nevojë për mundësi arsimimi,” ka thënë Musliu duke shtuar se partia e tij do të punojë në atë që gjuha shqipe të ketë statusin e gjuhës zyrtare.

“DSS është në gjendje të përmbush gjithçka që e planifikon, sidomos në punësim, i cili është edhe objektivi ynë kryesor,” ka thënë Stanojkovic.

Salihu ka thënë se kanë një program me aspekte universale, që do të thotë se ata synojnë përmirësimin e jetës së qytetarëve duke filluar nga siguria deri te ekonomia.

“Shumë shqiptarë në këto anë jetojnë akoma në një geto, kurse ka të tillë që janë zhvendosur dhe ata kanë nevojë për tu kthyer në mënyrë që ta vazhdojnë një jetë normale,” ka shtuar ai.

Taskovic ka thënë se përparësia e tij është se pasi që DS do t’i fitojë zgjedhjet edhe në nivel lokal pas 11 majit, do të ketë më shumë ndarje të mjeteve për Bujanocin.

Zeqiri ka thënë se për një zhvillimi nevojitet hapja e ndërmarrjeve të mesme dhe të vogla.

“Në Bujanoc, ne kemi fabrikën e duhanit, por pse nuk e kemi edhe komponentën e prodhimit final?” ka thënë ai duke folur për € 5 milionë të ndara nga qeveria qendrore për projektet komunale.

“Ka njerëz të cilët mbledhin kërpudha, andaj pse të mos u ndahen atyre mjete për të kultivuar ” ka thënë ai.

Taskovic ka thënë se me tre milionë të atyre fondeve, ata do të investonin në fabrikat ekzistuese, siç është ambalazhimi i HEBA-s dhe se si kjo do të hapte së paku 50 vende të reja pune, ndërsa 2 milionë tjera do të përdoreshin për ekonomi tjera të vogla.

Salihu u është përgjigjur bashkëfolësve të tij duke thënë se asgjë nuk mund të arrihet pa një nivel të mirë të sigurisë.

“Përveç kësaj, neve na nevojiten më shumë rrugë,” ka shtuar ai.

Salihu është pajtuar se administrata e kaluar nuk i ka shfrytëzuar mirë fondet, por ka theksuar edhe ai gjithashtu se kjo është çështje edhe e sigurisë.

“Nuk e di nëse ka ndonjë shtet në botë ku forcat e sigurisë nuk i lejojnë qytetarët e vet të kthehen nëpër shtëpi,” ka shtuar Salihu.

Stanojkovic është ankuar se ka shumë burime turizmi të cilat do të mund të shfrytëzoheshin për strategjinë e zhvillimit, siç është Banja e Bujanocit.

Kamberi ka theksuar se “do të ishte e kotë të pritej tërheqja e turistëve, kur prania e xhandarmërisë serbe vazhdon të jetë në rajon.”

Musliu është pajtuar se prioritetet duhet të përqendrohen rreth infrastrukturës dhe turizmit.

“Ne do të përqendroheshim të zhvillojmë bujqësinë më shumë dhe do t’i alokonim shumicën e mjeteve tona në këtë fushë”, ka thënë Mitrovic.

Kamberi ka folur për përbërjen etnike në këshillin komunal, i cili edhe pse drejtohet nga shumica shqiptare, aty ndarja në këshill midis serbëve dhe shqiptarëve është pesëdhjetë me pesëdhjetë për qind.

“Kurse në shëndetësi, arsim, administratë dhe shërbime publike, shumica janë serbë”, ka shpjeguar Kamberi.

Mitrovic është pajtuar se, për shembull, në sektorin e shëndetësisë, nga gjithsej 252 të punësuar, vetëm 85 sosh janë shqiptarë”, por ka shtuar se” nuk është e vërtetë se ka numër të barabartë të këshilltarëve komunalë në baza etnike, sepse më shumë ka shqiptarë”.

Musliu ka thënë se është e vërtetë se ka diskriminim në vija etnike, sidomos në kompanitë publike, ku ka shumë pak punëtorë shqiptarë kurse sa i përket fushave tjera, gjatë periudhës 2002-2008, pushteti vendor ia ka arritur të vendos një barazi.

Stanojkovic ka pranuar se ka diskriminim kudo, por ka thënë se të gjitha komunitetet duhet të punojnë në zvogëlimin e urrejtjes dhe diskriminimit midis njëri tjetrit.

“Megjithatë, bursat janë ndarë në mënyrë të barabartë si studentëve shqiptarë ashtu edhe atyre serbë,” ka shtuar ai.

Debati është mundësuar me ndihmën e Nismës së të Rinjve për të Drejtat e Njeriut, TV Aldi, një televizion lokal nga Presheva dhe nga Ministria e Jashtme e Zvicrës.