Ndrysho madhësinë e shkronjave

verzioni për printim

copyright

Jeta në Kosovë debaton rreth burgosjes së Sami Lushtakut

22 maj 2008  Emisioni “Jeta në Kosovë”, këtë të enjte ka diskutuar rreth asaj se a ka sundim të ligjit në Kosovë dhe se çfarë përshtypje fitojnë qytetarët kur i shohin ish ushtarët e Ushtrisë Çlirimtare të Kosovës që arrestohen nën akuza për vepra penale. A janë vlerat e luftës tabu dhe cili duhet të jetë roli i shoqërisë civile në inicimin e një debati të tillë?

Të ftuarit në vijim kanë folur rreth këtyre çështjeve:

Lulzim Peci - nga Instituti Kosovar për Kërkime dhe Zhvillim të Politikave, KIPRED
Nait Hasani - deputet i PDK-së në parlamentin e Kosovës
Halil Matoshi - analist
Ramadan Ilazi - nga organizata joqeveritare INPO


Fillimisht, është transmetuar një reportazh i përgatitur nga redaktori i BIRN-it për Kosovë, Krenar Gashi dhe gazetares Jeta Abazi. Aty është paraqitur në retrospektivë fjalimi i Lushtakut gjatë fushatës së zgjedhjeve të kaluara dhe është folur për burgosjen e tij tani në akuza për kërcënim të avokatit.

Në reportazh është parë se si secili qytetar i Kosovës i cili dëshiron të kandidojë në zgjedhje duhet ta mbush një formular ku gjendet edhe pyetja se a ka ai/ajo ndonjë të kaluar kriminale apo ka qenë nën akuza. Aty është zbuluar po ashtu edhe rregullorja në bazë të të cilës funksionon roli i kryetarit të komunës.

Hasani ka thënë se PDK-ja e ka emëruar Lushtakun duke pasur parasysh të kaluarën dhe kontributin e tij gjatë luftës çlirimtare.

Hasani ka kritikuar administratën e UNMIK-ut duke thënë se “kur partia jonë i ka dorëzuar dokumentet për zgjedhje, askush nuk ka reaguar. Faji është i UNMIK-ut që nuk e ka penguar këtë më herët por tani”, dhe ka shtuar se “kjo është një politikë që ka për synim inkriminimin e UÇK-së”.

Ilazi ka reaguar ndaj fjalës së Hasanit dhe e ka pyetur atë se “çfarë janë ato vlera” dhe ka shtuar se “ne nuk punojmë këtu sipas Kanunit ku duhet të dëshmohet burrëria, por Kosova sundohet nga ligji”.

Hasani është përgjigjur duke thënë se “Lushtaku është akuzuar për kundërvajtje e jo për vepër penale.”

Matoshi ka kritikuar veprimin e qeverisë e cila dorëzimin e Lushtakut e ka cilësuar si “akt burrërie”, dhe ka thënë se ai në të vërtetë ka qenë i obliguar ti bindet ligjit.

“Unë jam i brengosur sepse qeveria e ka bërë një deklaratë e cila e dëmton të ardhmen e vendit,” ka thënë ai, dhe ka shtuar se “qeveria është dashur ta përshëndesë vendimin e gjyçit e jo atë të Lushtakut.”

Peci ndërkaq ka thënë se “cilido i zgjedhur në Kosovë nuk duhet të lirohet nga përgjegjësia ndaj ligjit”.

“Gjykatat e UNMIK-ut nuk janë të huaja. Ato i takojnë shtetit tonë, kurse për mua është brengosës fakti se nuk ka pasur debat për këtë çështje derisa qeveria dhe shoqëria civile kanë heshtur ,” ka shtuar Peci.

Ilazi është pajtuar duke thënë se “veprimet e qeverisë kanë qenë të papjekura dhe ato vetëm kanë treguar se ajo fshihet prapa përgjegjësive.”

“Vendimi për z. Lushtaku është marrë qysh në vitin 2006, andaj ai duhet pas daljes nga burgu të thërret për zgjedhje të reja”, ka shtuar Ilazi.

Matoshi është pajtuar duke thënë se “Lushtaku në fakt është i zgjedhur legjitim, por ajo se çfarë ai duhet të bëjë më vonë është çështje e moralit”

Matoshi ka theksuar se nuk duhet të flitet aq shumë për vlera të luftës, “sepse në luftë ka marrë pjesë çdo shqiptar i Kosovës që fatmirësisht ka përfunduar me një happy end”.

“…por problemi është se tani të zgjedhurit po abuzojnë me ligjin,” ka thënë ai duke e kritikuar qeverinë që “qeverisjen e konsideron si sundim e jo si menaxhim.”

Ilazi është ankuar se “ne jemi munduar ta ndryshojmë klauzolën n draft-kushtetutë s ai përket imunitetit të deputetëve si dhe të parandalimi të tyre për kandisim nëse në të kaluarën kanë qenë nën akuza apo të dënuar, por ky rekomandim është injoruar”.

Peci ka thënë “në këtë rast është zbatuar ligji, mirëpo ligji duhet të ndryshojë, pasi që ligjërisht Lushtaku ka pasur të drejtë të kandidojë”

“Ne e pamë në reportazh se madje edhe policia i ka ndërruar deklaratat, ose për shkak të respektit të madh për z. Lushtaku ose nga frika”, ka nënvizuar Matoshi.

Peci e ka përfunduar duke thënë se “the qeveria e Kosovës duhet të vendosë nëse dikush mund të jetë mbi ligjin apo jo sepse Lushtaku moralisht nuk do të duhej të kishte kandiduar për kryetar të Skënderajt, ngase vetëm ligji e ka lejuar”.

Emisionin mund ta shikoni në linkun vijues:
Jeta në Kosovë debaton rreth burgosjes së Sami Lushtakut

“Jeta në Kosovë” është bashkëprodhim i Rrjetit Ballkanik të Gazetarisë Hulumtuese – BIRN - dhe televizionit publik të Kosovës - RTK-së. Emisioni transmetohet çdo të enjte duke filluar nga ora 20:15.