RSS Feedrss
letters Na shkruani >>
Kërkoni
 

Jetë në Kosovë diskuton për situatat emergjente

Sonte, Jeta në Kosovë, transmeton debat për situatat emergjente në vendin tonë. Më shumë


Produksioni televiziv

countryicon Klikoni këtu për të shikuar edicionin e fundit të emisionit "Jeta në Kosovë"!
Më shumë

Ndrysho madhësinë e shkronjave
+ -

verzioni për printim

copyright

“Jeta në Kosovë” debaton për festat zyrtare

29 maj 2008  Këtë të enjte, emisioni “Jeta në Kosovë” është fokusuar në pakon legjislative e cila del nga propozimi i Ahtisaarit për pavarësinë e Kosovës dhe implikimet e kësaj pakoje, me theks të veçantë në ligjet e miratuara së fundmi dhe të atij për të cilin është folur shumë, ligji për festat shtetërore..

Për të diskutuar për këtë dhe çështje tjera, të ftuar kanë qenë:

Hydajet Hyseni – deputet nga Partia Demokratike e Kosovës, PDK
Lutfi Haziri – deputet nga Lidhja Demokratike e Kosovës, LDK
Numan Balic – deputet nga partia e boshnjakëve, SDA
Dukagjin Gorani – Këshilltar politik i kryeministrit Thaçi
Teuta Sahatcia – kryetare e partisë reformiste, ORA dhe
Mufail Limani - gazetar

Hyseni ka folur fillimisht për “suksesin e pjesërishëm” me rastin e përfshirjes së 28 nëntorit në listën e festave, për të cilën edhe ka lobuar.

“Ky ligj nuk është paraparë të anashkalojë bashkësitë tjera, sepse për atë edhe quhet Ligj për Festat në Kosovë dhe si i tillë është dashur të përfshiheshin të gjitha festat etnike, ndërkombëtare, fetare dhe ato publike”, ka shpjeguar Hyseni duke shtuar se “të gjitha komunitetet janë konsultuar”.

Balic ka reaguar duke thënë se “nuk janë konsultuar të gjitha komunitetet” dhe ka kritikuar ligjin duke thënë se ai nuk e kupton çka është 28 shtatori që është propozuar si Dita e Boshnjakëve.

Haziri ka shtuar se “sipas ligjit, 11 festa do të jenë të obligueshme për të gjithë qytetarët e Kosovës, kurse grupi tjetër i festave do të rregullohet në kuadër të Këshillit Republikan për ditët memoriale”.

Balic ka theksuar se “problemi qëndron tek propozimi i Ahtisaarit i cili na është imponuar dhe mënyra se si është miratuar ai.”

”Pavarësia ka qenë kompromis për Kosovën në kontekst politik në mënyrë që të sigurohet një paqe etnike,” ka shpjeguar Gorani duke thënë se “kjo pastaj ka tërhequr kompromise tjera”.

“Kjo do të thotë se mund të jesh shqiptar por në Kosovë je kosovar, ashtu sikur një irlandez i cili në Amerikë është amerikan,” ka thënë Gorani.

Limani nuk është pajtuar me të duke thënë se “nuk mund të ketë identitet politik dhe identitet etnik ndaras” dhe ka shtuar se “identiteti suprem i një shteti është kombi”.

Sahatcia ka theksuar ndërkaq se “problemi qëndron në të kaluarën, kur ne si shoqëri është dashur të mendojmë mirë e mirë që miratimi i këtij ligji do të ishte emocional”.

Haziri ka shpjeguar se “as kushtetuta e as dokumenti i Ahtisaarit nuk kërkon injorimin e të kaluarës së shqiptarëve por vetëm e ndalon lënien anash të pakicave tjera.”

Limani ka thënë “për shkak të shpejtësisë se si po miratohen ligjet e bazuara në pakon Ahtisaari, vetëdija e publikut po bëhet më e dobët andaj si qeveria ashtu edhe parlamenti duhet që t’ua shpjegojnë më mirë këtë proces qytetarëve”.

“Unë jam në favor të një debati më të gjatë me Zyrën Civile Ndërkombëtare por nuk pajtohem se ne duhet të shkelim tani obligimet të cilat vetë i kemi marrë me nënshkrimin e pakos së Ahtisaarit”, ka thënë Haziri.

Hyseni, megjithatë, ka pranuar se “pakoja Ahtisaari përmban disa dispozita të cilat janë në kundërshtim me sugjerimet e konventave ndërkombëtare, siç është ligji për decentralizimin dhe trashëgiminë kulturore”.

Gorani ka thënë se “pakoja e Ahtisaarit nuk ka qenë zgjidhja më e mirë, por e vetmja, dhe se tani është e qytetarit t’i përshtatet realitetit të ri dhe dimensionit të ri shtetëror”.

“Çështja kryesore është se në secilën parti formohet nga një grup me ndikim dhe se kundërshtarët e tyre injorohen, madje edhe brenda së njëjtës parti”, ka thënë Balic, duke sugjeruar se duhet të dëgjohen edhe zërat tjerë kur merret një vendim.

Haziri, ndërkaq, ka nënvizuar se “pas një periudhe kohore, the bashkësia ndërkombëtare dhe organet vendore do ta rishikojnë dokumentin Ahtisaari sa I përket funksionalitetit të tij, kështu që do të mund të ketë ndonjë ndryshim.”

Në fund të pranishmit janë pajtuar se ligjet po miratohen në bazë të kompromisit të cilin e ka pranuar shumica shqiptare dhe si të tillë ata duhet t’i përmbahen atij kompromisi por me një sensibilitet më të kujdesshëm.

Emisioni “Jeta në Kosovë”, bashkëprodhim i RTK-së dhe Rrjetit Ballkanik të Gazetarisë Hulumtuese, BIRN, transmetohet çdo të premte me fillim prej orës 20:15

Komentet:

Nuk ka komente.

Your name:

Subject:

Comment:

Type in this code (used to prevent spam):