Ndrysho madhësinë e shkronjave

verzioni për printim

copyright

“Jeta në Kosovë” ka diskutuar për burgjet

03 prill 2008  Këtë të enjte, “Jeta në Kosovë” ka zbardhur punën nëpër burgjet e Kosovës.

Sa janë të sigurta burgjet në Kosovë? A ka masa që janë ndërmarrë për të parandaluar ikjen nga burgjet sikur që ishte rasti në burgun e Dubravës vitin e kaluar? A e kanë mësuar këtë mësim shërbimet e burgjeve prej atëherë? A i përmbushin standardet evropiane burgjet në Kosovë?
Sa është i shpërndarë korrupsioni në shërbimin korrektues? A mund ta “blesh” ikjen nga burgu? Kush po i furnizon të burgosurit në Kosovë me telefona mobilë dhe me narkotikë?

Gazetarët hulumtues të BIRN-it kanë raportuar për disa nga parregullsitë e gjetura në drejtësinë Kosovare, derisa panelistët në debat kanë diskutuar rreth tyre.

Të ftuar në studio ishin:

Resmi Hoxha – Drejtor i Shërbimit Korrektues të Kosovës
Xhevat Danca – Prokuror publik;
Xhevat Mexhuani – ish drejtor i Shërbimit Korrektues të Kosovës, në kohën kur ka ndodhur ikja nga burgu i Dubravës;
Tome Gashi – Avokat dhe këshilltar juridik i kryeministrit;
Betim Musliu – gazetar i cili punon në çështjet e drejtësisë;

Ai i cili ka filluar debatin ka qenë z. Hoxha i cili ka folur për Dubravën si burgun më të madh në Kosovë, për të cilin ka thënë se nuk është vend i sigurt, prandaj Kosovës i duhen edhe më shumë qendra të burgimit.

“Ne po përpiqemi të kemi një burg i cili është nën siguri të lartë, ku do të vendoseshin personat më të rrezikshëm” ka thënë ai.

Mexhuani ka pranuar se në kohën kur ai ka qenë në krye të burgjeve, janë gjetur shumë substanca narkotike dhe telefona mobilë më mesin e të burgosurve.

“Kam insistuar të zbulohet se kush qëndron prapa kësaj, dhe gjatë tërë kohës kam qenë në kontakte të vazhdueshme me Ministrinë e Drejtësisë”, ka thënë Mexhuani i cili ka shpjeguar se përgjigja e ministrisë ka qenë gjithnjë se “gjithçka është e miratuar.”

Mexhuani ka folur kundër ish sekretarit të përhershëm të ministrisë, Mul Deskut, i cili sipas Mexhuanit nuk e ka përkrahur këtë ta luftojë këtë fenomen.

Lexoni raportin hulumtues të BIRN-it mbi Ministrinë e Drejtësisë dhe Mul Deskun. http://balkaninsight.com/en/main/investigations/9022/ )

Hoxha nuk është pajtuar. “Nuk mendoj se Ministria e Drejtësisë dhe ish Sekretari i Përhershëm nuk kanë dashur të ju përkrahin,” Hoxha i është drejtuar Mexhuanit.

Gashi ka qenë më kritik. “Nuk është logjike se si Mexhuani nuk ka marrë kurrfarë masash kundër telefonave celularë në burgje” ka pohuar ai duke shtuar se “për të burgosurit, telefonat mobilë janë më të rrezikshëm se sa armët, pasi që u ndihmojnë për të ikur.”

Ndërsa, Mexhuani është përgjigjur se burgjet nuk janë menaxhuar nga ai por nga Ministria e Drejtësisë.

“Çdo javë jam takuar me Mul Deskun dhe kam folur shtruar me të,” ka thënë Mexhuani.

Danca, në anën tjetër, ka refuzuar të komentojë për ikjen nga burgu famëkeq i Dubravës, duke thënë se “kjo do të mund të jetë ndërhyrje në hetimet që janë duke vazhduar.”

Gjatë debatit, BIRN ka paraqitur tri reportazhe nga terreni, të cilat kanë qartësuar dhe intensifikuar debatin e nxehtë.

Një raport hulumtues nga redaktori për Kosovë i BIRN-it, Krenar Gashi ka treguar për korrupsionin në gjykatën e Gjilanit, ku dy banda famëkeqe janë liruar përkundër akuzave për tentim vrasje dhe posedim të armëve pa leje.

Një raport tjetër nga Betim Musliu ka treguar se si njerëzit mund ta blinin lirinë e tyre.

Duke i intervistuar ish të dënuarit, Musliu ka theksuar se disa njerëz u kanë paguar zyrtarëve shuma të majme parash për t’i liruar të afërmit e tyre nga burgu.

Në segmentin “Kulmi i javës”, një raport nga Jeta Abazi ka treguar se rregullorja për ndalimin e pirjes së duhanit nuk është duke u respektuar në komunën e Vitisë ku ajo rregullore shkelet edhe nga vetë zyrtarët komunalë.

Pas transmetimit të reportazhit të parë, Tomë Gashi është kthyer në temën e mëparshme, duke shtuar se ka disa mënyra se si “blihet” liria, për të cilat i din ai në bazë të ish klientëve të tij.

Musliu ka thënë se prokurorët kanë dështuar ta bëjnë punën e tyre, derisa gazetarët dhe mediat janë më efikase në terren.

“Unë e kam kuptuar se shumë të mitur në premisat korrektuese kanë mundur ta blejnë lirin e tyre duke u paguar zyrtarëve shumë para” ka thënë Musliu, duke pohuar se këta kanë qenë të dënuar për krime të rënda.

Gashi ka thënë se burgjet në Kosovë ishin shndërruar në biznese fitimprurëse. “Në burgjet e Kosovës ju mund të gjeni gjithçka që doni. Vetëm thoni çka, gardianët do t’ua sjellin juve atë me pagesë,” ka thënë ai, duke shtuar se qeveria është e përkushtuar të punojë kundër kësaj praktike.

Emisionin mund ta shikoni në linkun vijues:
“Jeta në Kosovë” ka diskutuar për burgjet

“Jeta në Kosovë” është bashkëprodhim i Rrjetit Ballkanik të Gazetarisë Hulumtuese – BIRN - dhe televizionit publik të Kosovës - RTK-së. Emisioni transmetohet çdo të enjte duke filluar nga ora 20:15