Grupi i armatosur shqiptar kthehet në skenë

11 tetor 2007   Rishfaqja e Armatës Kombëtare Shqiptare në zonat rurale të Kosovë ngjall reagime për rrezikun që mund t’i kanoset gjendjes së sigurisë

Krenar Gashi në Prishtinë

“Lufta është e pashmangshme! E vetmja mënyrë për t’u shmangur një luftë në Ballkan është pranimi dhe njohja e pavarësisë së plotë të Kosovës”, thotë Gafurr Adili, përfaqësues i grupit të armatosur, Armata Kombëtare Shqiptare, AKSH.

Adili, organizata e së cilit – e kategorizuar nga OKB-ja si terroriste – po angazhohet për bashkimin e të gjitha trojeve shqiptare tha për Balkan Insight se “pavarësia e Kosovës është kërkesë minimale”.



Shfaqja e sërishme e AKSH-së, ka ngjall konfuzion në Kosovë. Edhe pse disa nuk e konsiderojnë si rrezik real ndaj sigurisë, të tjerë tërheqin vërejtjen se kjo organizatë mund të fitoj më shumë përkrahje në rast se vazhdohet me vonimin e zgjidhjes së statusit final.

Tensionet përkitazi me zgjidhjen e statusit veçse janë rritur, derisa procesit negociues për këtë çështje po i shihet fundi. Përderisa politikanët kosovarë po përgatiten të takohen me delegacionin serb në një ballafaqim të radhës që do të mbahet në Bruksel me 14 tetor, AKSH-ja ka bërë një rikthim në skenë.

Pamjet e xhiruara afër kufirit mes Kosovës dhe Serbisë, në komunën e Podujevës, tregojnë një grup prej 10-12 personash të uniformuar dhe të armatosur – disa duke mbajtur snajperë të sofistikuar – që po patrullonin njëri prej akseve më të rëndësishme rrugore të Kosovës, ku ndalnin dhe kontrollonin automjetet.

“Nuk jemi rikthyer. Gjithmonë kemi qenë këtu. Por, tash, kemi vendosur t’i rrokim armët sërish sepse popullata [shqiptare] po kërcënohet nga shumë grupe paramilitare që po tentojnë të hyjnë në Kosovë nga Serbia”, tha Adili përmes telefonit, nga Shqipëria.

“Ne po operojmë në zona ku trupat e KFOR-it në Kosovë nuk veprojnë. Këto janë kryesisht fshatra përreth kufirit me Serbinë ku nuk ka kurrfarë trupa paqeruajtëse në veprim”, tha Adili. “Ne nuk do të konfrontohemi me trupat e NATO-së...Nëse vendosin ta vejnë këtë zonë nën kontroll dhe të garantojnë siguri për popullatën lokale, ne do t’i lëshojmë armët dhe do të kthehemi në shtëpi”.

Kolonel Betrand Bonneau, zëdhënës i KFOR-it, thotë se ata duhet ta bëjnë një gjë të tillë menjëherë. “Le t’i lëshojnë armët, të qëndrojnë në shtëpi dhe të jetojnë pa dhunë, ose të përdorin mjete demokratike për të marrë pjesë pozitivisht në përcaktimin e të ardhmes së Kosovës”, Bonneau tha për Balkan Insight.

“Këto grupe janë të rrezikshme e të panevojshme për sigurinë”, tha ai, duke sqaruar se KFOR-i për çdo ditë “ndërmerr patrullime të sinkronizuara me forcat e armatosura të vendeve fqinje, duke përfshirë edhe Serbinë”.

Shqetësimet për sigurinë në Kosovë po rriten, edhe pse autoritetet dhe shumë ekspertë besojnë se AKSH-ja nuk paraqet kërcënim serioz ndaj sigurisë publike.

Kosova ndodhet nën administrim të OKB-së që nga viti 1999 kur fushata bombarduese e NATO-së i detyroi autoritetet serbe t’i tërheqin trupat nga territori. Misioni paqeruajtës i KFOR-it, nën udhëheqjen e NATO-së, u vendos për të mbikëqyrur paqen dhe sigurinë, si dhe të mbështes administratën e OKB-së.

Pjesëtarët e AKSH-së janë shfaqur kohë pas kohe që nga përfundimi i luftës në vitin 1999. Ata kanë marr përgjegjësi për një sërë sulmesh me bomba në Kosovë që nga atëherë. Sidoqoftë, grupi u tërhoq nga syri i publikut për një kohë, përderisa negociatat rreth statusit të Kosovës, të mbikëqyrura nga ndërkombëtarët, po vazhdonin.Qe nga viti 2006 ata nuk u patën parë.

Ministri i Brendshëm Blerim Kuçi duket të jetë i brengosur. “Jam i shqetësuar. Çdo strukturë paralele është jolegale dhe e dëmshme. Ne nuk e dimë se çfarë dhe kë e përfaqësojnë ata”, tha Kuçi për Balkan Insight, duke iu referuar AKSH-së, e cila përshkroi veten si krah militant i Frontit për Bashkim Kombëtar Shqiptar.

Sidoqoftë, Kuçi tha se sot në Kosovë është e lehtë për dikë të shërbehet me mashtrime. “Në Kosovë ka shumë armë dhe është lehtë për dikë që të armatoset dhe të thotë publikisht se përfaqëson AKSH-në, apo AKSH 1, apo çfarëdo emri tjetër”. Ai shtoi se përderisa statusi politik i Kosovës mbetet i paqartë, do të jetë gjithnjë e më e vështirë të gjendet gjuhë e përbashkët më grupe të tilla si AKSH-ja.

“Njerëzit tanë janë idealistë. Ata janë veteranë të cilët luftuan në të gjitha luftërat e mëparshme në Ballkan. Janë njerëz që udhëhiqnin lëvizje ilegale gjatë komunizmit dhe njerëz që janë të gatshëm të vdesin, nëse është e nevojshme, për lirinë e vendit të tyre”, tha Adili, i cili refuzoi të tregonte numrin e luftëtarëve të AKSH-së, duke thënë se kjo është informatë me vlerë strategjike. “Çfarë mund të them është se numri po rritet”.

Ramë Arifaj, këshilltari për siguri i kryeministrit, e ndërlidhi paraqitjen e AKSH-së me vonesat në zgjidhjen e statusit të Kosovës. “Vonesa të njëpasnjëshme në zgjidhjen e statusit të Kosovës reflektohen qartazi në pakënaqësinë e popullatës të cilët po humbin durimin”, tha Arifaj. Arifaj beson se AKSH-ja “nuk e gëzon vullnetin ose kapacitetet për të shkaktuar trazira”, por se, tha ai, nuk duhet injoruar.

Lulzim Peci, ekspert i çështjeve të sigurisë, ndan të njëjtin mendim. “Praktikisht, ata nuk janë forcë që paraqesin rrezik. Mund të kenë kapacitete për të shkaktuar incidente të vogla, por jo të mëdha”, tha ai. Sidoqoftë, Peci mbetet i brengosur por faktin se situata e përgjithshme në Kosovë i ka krijuar kushtet për ekzistimin e grupeve të armatosura, të ngjashme me AKSH-në, në të gjitha komunitetet etnike.

“Kosovës do t’i duhet një forcë vetjake e sigurisë për ta mbrojtur vetën në mënyrë institucionale”, u tha së fundi gazetarëve kryeministri Agim Çeku. Por Çeku, i cili në vitin 1999 udhëhoqi forcën guerile të Ushtrinë Çlirimtare të Kosovës në luftën kundër ofensivës së Slobodan Milosevicit, tërhoqi vërejtjen se “paraqitja e individëve të tillë nuk dërgon sinjale të mira për Kosovën”.

Adili ka qasje krejt tjetër. “Kur të gjitha mjetet politike shteren, atëherë vjen nevoja për mjete demokratike të dhunshme”, tha ai.

“Ne gjithmonë i kemi fituar luftërat në fushëbeteja dhe gjithmonë i kemi humbur kur jemi ulur në tryezën e negocimit”, përfundoi ai – me fjalë që mund t’i japin kahe tjetër shqetësimeve në Kosovë.

Krenar Gashi është redaktor për Kosovë i Rrjetit Ballkanik të Gazetarisë Hulumtuese, BIRN. Balkan Insight është publikim i BIRN-it në internet.